Dareewalkii loo xil saaray Dhakhaatiir Cuba u dhashay oo Al-Shabaab ay ka qafaasheen Mandheera ayaa lagu helay dambi ah in uu afduubtay.
Darawalkii hore ee maamulka Mandheera oo lagu eedeeyay afduubka labo dhaqtar Cuban ah 2019 ayaa lagu helay dambi. Isaxaaq Roobow ayaa la sheegay in loo xilsaaray labadan dhaqaatiir markii ay Afduubteen Al-Shabaab oo ay u qaadeen dhanka Soomaaliya. Xukunka la soo saaray Arbacadii, Garsooraha Maxkamadda Milimani Law Courts Martha Nanzushi ayaa sheegtay in maxkamaddu ay ku qanacday shaki la’aan macquul ah in darawalku uu si firfircoon ugu lug lahaa afduubka Landy Rodriguez, dhakhtar qalliin iyo Herera Correa, oo ah dhakhtar guud. “Kadib markii aan qiimeeyay cadeymaha diiwaanka ku jira, waxaan ogaaday in xeer ilaalintu ay cadeysay eedeymaha ka dhanka ah eedaysanaha halkan, waxaana ku xukumi doonaa si waafaqsan qodobka 215 ee Xeerka Habka Ciqaabta (CPC),” Nanzushi ayaa xukuntay.
Kiiska, xeer ilaalinta ayaa maxkamadda u sheegtay in eedaysaneyaashu ay 12-kii April 2019 ku wareejiyeen dhakhaatiirta argagixisada, xilli ay u kaxeeyeen isbitaalka Mandheera, iyagoo isticmaalayay baabuur ay dowladdu leedahay. Dhakhaatiirta ayaa waxaa weerar gaadmo ah ku qaaday rag hubeysan oo watay labo gaari oo nooca Probox-ka ah, kuwaasi oo wadada ka xiray ka hor inta aysan rasaas ku furin. Mid ka mid ah askartii ilaalineysay caafimaadka ayaa la dilay isla markiiba, halka mid kalena uu baxsaday isagoo dhaawac ah. Dhakhaatiirta ayaa la sii daayay bilo ka dib markii ay wada xaajood la yeesheen kooxihii afduubay. Wadahadalladan ayaa la sheegay in ay bilaabeen odayaasha deegaanka. Dhakhaatiirta la afduubay ayaa ka mid ahaa 100 khabiir oo Cuba u dhashay oo dalka yimid bishii June 2018 heshiis dhexmaray Wasaaradda Caafimaadka iyo dawladda Kuuba.q
