Boqolaal kamid ah Ragga Mallaayga ku iibiya Kawaanka degmada Cabdulcasiis ee Gobolka Banaadir ayaa waxaa ay Maanta bannaanbax xoogan ka dhigeen qeybo kamid ah Waqooyiga Magaalada Muqdisho.
Bannaanbaxayaasha ayaa ka cabanaya in dowladda Soomaaliya ay si awood ah kula wareegtay Kawaankii Mallaayga ee degmada Xamarweyne, isla markaana xalay Saqdii Dhexe Ciidamo la dul-dhigay.
Dadka bannaanbaxa dhigaya ayaa isugu soo aruuray fagaaraha Taalada Daljirka Daahsoon ee degmada Boondheere, iyaga oo waddadada xirtay, waxaana qaarkood oo somalisan la hadlay ay ugu baaqeen Madaxweynaha Soomaaliya uu arrintaan soo farogeliyo, isla markaana loo daayo Kawaanka, maadaama nolol maalmeedkooda ay ku maareeyaan.
Tan iyo markii dib loo doortay Madaxweynaha Soomaaliya Xasan Sheekh Maxamuud ayaa waxaa soo cabatay cabashada la xiriirta dhulalka, iyada oo dowladdaan ay qaadatay dhulal badan oo Danta Guud, isla markaan la siiyay Dad Ganacsato ah.
