Warbaahinta ay maalgeliso dowladda Mareykanka, Voice of America (VOA), oo muddo laba bilood ah xaalad hubanti la’aan ah ku jirtay, ayaa wajahaysa jahawareer sharciyeed kadib isbeddelkii ugu dambeeyay ee ka dhacay maxkamadda rafcaanka.
Shaqaalaha VOA ayaa is diyaarinayay inay toddobaadkan shaqooyinka dib ugu laabtaan, kadib markii ay horraantii April guul ku-meel-gaar ah ka gaareen dacwad ay ka gudbiyeen maamulka Trump. Hase yeeshee, qorshahaas hadda wuxuu u muuqdaa mid hakad galay.
VOA iyo warbaahinno kale oo ay hoos tagto US Agency for Global Media (USAGM) ayaa si rasmi ah u xirmay tan iyo markii maamulka Trump uu bishii Maarso soo saaray amar madaxtinimo oo lagu kala dirayay USAGM — hay’addaas oo maamusha maalgelinta warbaahinta u adeegta dimuqraadiyadda iyo ka hortagga borobogaandada caalamiga ah, sida Radio Free Europe/Radio Liberty, Radio Free Asia iyo Middle East Broadcasting Networks.
Markii inta badan shabakadahaas ay dacwo ka gudbiyeen, Garsooraha Maxkamadda Federaalka ee D.C. Royce Lamberth ayaa April bixiyay amar horudhac ah oo ka dhan ah Aqalka Cad, isaga oo amarkii Trump ku tilmaamay “mid sharci-darro ah” oo laga yaabo inuu dhaafay awoodda madaxweynaha.
Go’aankaasi wuxuu u muuqday guul u soo hoyatay VOA. Agaasimaha hay’adda, Michael Abramowitz, oo ka mid ah dadkii dacwadda waday, ayaa shaqaalaha u diray email Jimcihii fiidkii, isagoo sheegay in USAGM ay dib u furayso akoonnadii shaqaalaha isla markaana lagu diyaarinayo dib ugu laabashada xafiisyada si tartiib tartiib ah.
Laakiin Sabtidii, saddex garsoore oo ka tirsan Maxkamadda Rafcaanka ee D.C. ayaa bixiyay amar hakad ah oo joojinaya go’aankii April.
Go’aanka, oo ay laba garsoore oggolaadeen halka mid diiday, ayaa sheegay in dowladda ay u badan tahay inay ku guuleysan doonto rafcaanka, isla markaana garsooraha maxkamadda hoose uusan lahayn awood uu kaga hor istaago fulinta amarka madaxweynaha ee la xiriira shaqaalaynta iyo bixinta deeqaha.
Ma cadda in VOA ay si rasmi ah u joojisay qorshihii shaqaalaha lagu soo celin lahaa, iyadoo Sabtidii gelinkii dambe shaqaalaha hay’adda ay sugayeen amar rasmi ah oo dowladda ka yimaada.
“Waxaan ogayn bilowgii horeba in tani ay noqon doonto geeddi-socod dheer,” ayay tiri Patsy Widakuswara, madaxa VOA ee Aqalka Cad iyo mid ka mid ah dadka dacwadda gudbiyay.
“Wariyeyaashu waxay rabaan oo kaliya inay ku laabtaan newsroom-ka, si ay u gaarsiiyaan warar dhab ah, dhexdhexaad ah, una hoggaansan dastuurka, dadweynaha caalamka ee nagu tiirsan.”
Steve Herman, madaxa wararka qaranka ee VOA, ayaa isna yiri: “Saddex tallaabo hore u qaad, hal tallaabo gadaal u laabo. Waan ogayn in dagaalkani uu noqon doono mid dheer.”
Go’aanka hakinta waxaa ansixiyay laba garsoore oo uu magacaabay Trump: Neomi Rao iyo Gregory Katsas. Garsoore Cornelia Pillard, oo uu magacaabay Madaxweyne Obama, ayaa ka biyo diiday go’aanka, iyadoo sheegtay in VOA iyo warbaahinta kale ee ka hortimid amarka Trump ay wajahayaan “khasaaro culus oo aan la soo celin karin haddii aan la helin xeer ilaalin sharci ah.”
Waxay intaas sii raacisay: “Ujeeddada hakadku waa in lagu hayo xaaladdu sida ay tahay inta dacwadda si buuxda loo dhageysanayo.
Balse hakadkani wuxuu ka hor imaanayaa arrintaas, wuxuuna VOA si buuxda uga aamusinayaa mustaqbalka dhow, wuxuuna meesha ka saarayaa awoodda Radio Free Asia iyo Middle East Broadcasting Networks ee ah inay si buuxda dacwaddooda u gaarsiiyaan heer dhammaad.”
Radio Free Asia ayaa horey u shaacisay in ay shaqo ka joojin ballaaran sameysay isla markaana ay xirto adeegyo badan oo ay ku lahayd qaaradda Aasiya, kadib markii ay waayeen maalgelintii dowladda.
USAGM kama aysan jawaabin codsi warbaahineed oo la xiriira arrintan, hase yeeshee Kari Lake, la-taliye sare oo hay’adda ka tirsan, ayaa barta X (Twitter) ku qoray in go’aanka maxkamadda rafcaanku uu yahay “guul weyn oo u soo hoyatay Madaxweyne Trump iyo Qodobka II ee Dastuurka Mareykanka,” oo qeexaya awoodaha madaxweynaha.
Waxay intaas ku dartay: “Waxaa cadaatay in garsooraha maxkamadda hoose uusan si toos ah u maamuli doonin hay’adda, sida uu u muuqday inuu doonayay.”
