Wasiirka amniga gudaha ee xukuumada Soomaaliya Maxamed Abuukar Islow Ducaale ayaa ka hadlay xirnaahsha wadooyinka Muqdisho oo ay ciidamada amaanka dhagxaan ku gooyeen jidadka xaafadaha dhex-dooda mara ee Caasimadda Muqdisho, kuwaasi oo inta badan isticmaalaan gaadiileyda Muqdisho.
Mr Islow ayaa sheegay in dhawaan la furi doono wadooyinkaas, kana dalbaday shacabka dagan Muqdisho in ay muujiyaan dulqaad inta ay xiranyihiin wadooyinka, maadaama uu yiri laga shaqeynayo amaanka Caasimadda Muqdisho.
Sidoo kale Wasiirka Aminga ayaa shaaca ka qaaday in ay ka shaqeyn doonaan xaqiijinta amaanka , islamarkaana ay xoojin doonaan nabad galyada, si looga hortago falalka amaan darri ee xiliyada qaar ka dhaca magaalada Muqdisho, waxaana uu ugu baaqay shacabka in ay la shaqeeyaan hay’adaha amaanka ee dowladda.
Ciidamada amaanka ee dowladda, gaar ahaan kuwa howlgalka xasilinta ayaa baaritaano joogta ah ka wada xaafadaha Muqdisho, kuwaas oo ay ku xaqiijinayaan amniga, waxaana inta badan ciidamadu ay xireen wadooyinka jidcadayaasha ah ee Muqdisho, si gaadiidka iscticmaala halkaasi ay u soo maraan baaritaanka ciidamadaasi ay ka sameeyaan isgoosyada qaar ee magaalada Muqdisho.
