Dowladda Turkiga ayaa ku eedeysay mintidiinta Kurdiyiinta inay ka dambeeyaan qarax ay lix qof ku dhinteen oo ka dhacay waddada ganacsiga ee Istanbul, waxayna sheegtay in booliisku ay xireen 22 qof oo uu ku jiro qofka looga shakisan yahay inuu qaraxaas maleegay.
Wasiirka arrimaha gudaha Suleyman Soylu ayaa sheegay in kooxda Kurdistan Workers Party (PKK) iyo maleeshiyada Kurdiyiinta Suuriya ee YPG, oo Ankara ay sheegtay in ay yihiin garab ka mid ah PKK, ay mas’uul ka ahaayeen weerarkii ka dhacay waddada taariikhiga ah ee Istiklal axaddii.
Haweenayda looga shakisan yahay iney fulisay qaraxan ayaa la xiray, Booliska ayaana u adeegsaday Ey si ay u baaraan gurigeeda waxayna ka heleen dahab, lacag iyo rasaas.
Lix muwaadin oo Turki ah oo ay ku jiraan wiil yar iyo aabihiis ayaa lagu dilay weerarka. Ma jirto cid sheegatay mas’uuliyadda.
Warbixinadii hore ee talefishinka TRT waxay soo bandhigay sawiro qof, oo u muuqday dumar ah oo oo boorso dhigaysa goobta qaraxu ka dhacay ka dib markii ay qabatay camera CCTV ah oo halkaas ku xirneyd.
Weerarkan ayaa dhaliyay walaac laga qabo in Turkiga ay ku dhuftaan dhacdooyin badan ka hor doorashooyinka kacsan ee la qorsheeyay inay dhacaan Juun 2023.
