Duleedka degmada Balad Xaawo ee gobolka Gedo waxaa maanta ka qarxay dagaal u dhaxeeya ciidamada dowlada federaalka Soomaaliya iyo ciidamada Daraawiishta Jubbaland uu hogaaminayo wasiirka Amniga Jubbaland Cabdirashiid Janan.
Dagaalka oo saakay barqadii bilowday ayaa lasoo sheegayaa in goordhaw wax xoogaa qaboobay, waxaana wali aaga dagaalka laga maqlayaa rasaas goos goos ah ay is dhaafsanayaan ciidamada iska soo horjeeda.
Sida aan wararka ku helnay ciidamada dagaalamaya ayaa ku sugan xaafado ku dhaw dhaw xadka magaalada Mandheera, waxaana dagaalka xoogiisa maanta uu ka dhacay xero duleedka Balad Xaawo kaga sugnaayeen ciidamada Daraawiishta Jubbaland.
Khasaaro badan oo isugu jira dhimasho iyo dhaawac ayaa dagaalka kasoo gaaray labada dhinac ee dagaalamaya, waxaa sidoo kale dagaalka dhimasho iyo dhaawac uu kasoo gaaray dad shacab ah oo ku sugnaa aaga dagaalka iyo xaafado kale oo ka fog fog.
Ciidamo badan oo katiran dowlada federaalka Soomaaliya kana tagay degmada Doolow iyo deegaano kale oo katiran gobolka Gedo ayaa gaaray degmada Balad Xaawo kuwaa oo garab ku siinaya dagaalka ciidanka dowlada.
Gaadiid dagaal iyo ciidamo badan oo gurmad ah ayaa lagu oo waramayaa in ay tagaan aaga ay isku hor fadhiyaan ciidamada dowlada iyo kuwa maamulka Jubbaland, waxaana laga cabsi qabaa in mar kale ciidamada ka dhax qarxo dagaal culus.
Ku-simaha guddoomiyaha gobolka Gedo Cismaan Nuur Xaaji Macalimow, oo la hadlay idaacadda BBC Soomaali, ayaa sheegay inuu dagaalka ka dhacay xuduuda dowladaha Soomaaliya iyo Kenya.
Guddoomiyaha ayaa xusay inay ciidamada dowladda Soomaaliya hadda joogaan xuduudda labada dal, ayna iska difaacayaan weerar uga imanaya dhanka Kenya, sida uu hadalka u dhigay.
Cismaan ayaa ciidamad Kenya ku eedeeyey inay dagaalka kusoo biireen, oo ay madaafiic ku garaacayaan gudaha magaalada Beled-Xaawo, taasoo dhibaato naf iyo maal leh ay kasoo gaartay shacabka ku nool magaalada.
Guddoomiyaha ayaa intaas ku daray in Kenya ay dagaalka kusoo qaaday Soomaaliya ayada oo garab siineysa ciidamada uu hoggaaminayo Cabdirashiid Janan.
“Ciidankan waxay difaacayaan xuduudda, weli toos uma gelin gudaha Kenya, balse halkaas ayaan ugu tageynaa oo ugu galeynaa, intii shacabka madaafiic lagu garaaci lahaa,” ayuu yiri Cusmaan Nuur Xaaji.
“Waan ka xunahay in Kenya ay soo weerarto shacabkeena oo madaafiic ku garaacdo shacabkeena. Inta ka badan indhaha kama xiran karno Kenya, gudaha ayaan ugu galeynaa,” ayuu yiri.
Guddoomiyaha ayaa wax laga xumaado ku tilmaamay in Cabdirashiid Janan uu maanta hoobiyo iyo madaafiic ku garaaco magaaladii uu muddo 8 sano ah ka talinayey, isagoo ku sifeeyey inuu ka naxariis daran yahay kooxda Al-Shabaab.
“Kenya iyo nimanka oo is garabsanaya ayaa xabad nagu soo wada iyo hoobiyeyaal,” ayuu yiri.
